اورمونون مدني فعاللاري، سويداشلاريميزي اورمو گؤلو
اطرافيندا کئچيره جک کومپانييايا قوشولماغا چاغيرديلار
گونازتی وی
معلوم اولدوغو کيمي گونئي آذربايجان ميللي کومانداسي تيراختور فوتبول تاخيمي نين 100000-له طرفداري 2010-جو ايل آپرئل آيي نين 2-ده (1388-جي ايل فروردين آيي نين 13-او) اورمو گؤلونون قوروماسي (بلکه ده قورودولماسي) ايله باغلي کومپانييا کئچيره جکلريني آچيقلاييبلار. اونلار قئيد ائتديگيميز تاريخده اورمو گؤلو اطرافينا توپلاشاراق ميللي-مدني مراسيملر حياتا کئچيره رک اورمو گؤلونون قوروماسي تهلوکه سيني بؤلگه مسئوللاري، ايران دؤولتي، دونيا ايجتيماعيتي و بوتون ائکولوژي قايغيسينا قالان اينسانلارا چاتديراجاقلار.
بونونلا باغلي اورمو شهري نين بير سيرا ضيالي، ميللي-مدني فعالي، يازيچي، ژورناليست و اونيوئرسيتئت اؤيرنجيلري بيانات ياييبلار. اونلار اورمو گؤلونون قوروماسيندا اؤلکه نين صلاحيتلي اورقانلاري و يئرلي (وستان) مسئوللاري طرفيندن تدبير آلينماماسيني وورقولاياراق، گؤلون قوروماسيندا بير نئچه فاکتورون اولدوغونو خاطيرلاديبلار.
بياناتدا قئيد اولونور کي، بيز تيراختور طرفدارلاري نين تشببوسونو آلقيشلاييريق و بوتون آذربايجان سئور سويداشلاريميزي بو کومپانييايا قوشولماغا چاغيريريق. قئيد اولونور کي بوتون سويداشلاريميزين عاييلهوي شکيلده قاتيلمالارينا اوميد ائديريک. کومپانييانين پروقرامينا اويقون اولاراق قاتيلانلار اؤزلري ايله آذربايجانين قيرميزي رنگلي پارچاسي و سو بارداقلاري گتيرسينلر. 2010-جو ايل آپرئل آيي نين 2-ده (1388-جي ايل فروردين آيي نين 13-او) ساعات 12-ه اورمو گؤلو کؤرپوسو اطرافيندا توپلاشان سويداشلاريميز ميللي-مدني مراسيملر حياتا کئچيريله جکلر. سوندا بو واسيطه ايله اورمو گؤلونون نيجاتي اوغروندا موثبت بير آدديم آتيلاجاغينا اوميد ائديلير.
علاوه اولاراق قئيد ائدک کي، شرحچيلريميزين فيکريجه ميلتيميزين اورمو گؤلو اطرافيندا توپلاشيب بيرليک نوماييش ائتديرمه سي آذربايجانين آيريلماز حيصه سي اولان ازه لي تورپاقلاريميزا گؤز تيکن بدخاه قونشولاريميزادا بير مساژ اولاجاق. بيز بونونلا هله ده اورمو و باتي آذربايجاندا کيمين حاکيم اولدوغونو بير داها نوماييش ائتديريب و بونو ثوبوت ائتميش اولاجاييق.
گؤروش زاماني : 2010-جو ايل آپرئل آيي نين 2-ده
(1388-جي ايل فروردين آيي نين 13-او)
ساعات 12 . اورمو گؤلو کؤرپوسو