أحمد صادقی  أشراقی . فرمان . ألف ـ نورانلی

آذرخش

أحمد صادقی أشراقی . فرمان . ألف ـ نورانلی آذرخش خاطیرۀ لر دفتریندن بیر یارپاق : کئچمیش یوُزایلدن آرتیق تاریخ پروسئسیندن بوگوُنۀ قدرگوُنئی آذربایجاندا یوُز مینلرجۀ شرفلی ؤ اوُز خالقینا ، آنا وطنینۀ وُورغون اوُلان چوُخ سایدا فداکاراینسانلاریارانمیشدیر، بو دئیرلی اینسانلارأن چئتین ؤ قارانلیق دوُورلردۀ ، ایستراوُدلو سیلاح ألۀ آلماقلا ، ایستر قلم سیلاحی ایلۀ آذربایجان میللتی نین وارلیغیندان مدافعۀ اتمئک هدفی ایلۀ فارس راسیسمی ؤ یا مرُتجع لرۀ قارشی نا برابر دوُیوش مئیدانیدا چئشیدلی شیوۀ لرلۀ میللتیمیزین تاپدالانمیش کیملیگیندن ، آنا دیلیمیزدن زامان ـ زامان بوُ گونۀ قدربوُیوک شهامت لۀ مجادیلۀ ائدیب ؤ میللی ، مقدس هدف لری یوُلوندا اوُز جانلارین فدا اتمیش لر.

چوُخلاری سنگرلردۀ دوُشمانلا اوُزـ اوُزۀ دوُیوشرکن ، چوُخلاری زیندانلاردا اشکنجۀ آلتیندا ؤ چوُخلاریدا دارآغاج لاریندان تأسوفلۀ آسیلمیشلار، لاکین آدلاری آذربایجان شهیدلری تاریخیندۀ سوُنسوز سایغی ایلۀ ثبت اوُلونموشدور . چوُخلاری دا اوُلوب کی ظالیمین آردیجیل ظوُلملرینۀ ؤ یوُل یوُلداشلاری نین آردی آردینا اعدام اوُلماسینا داوام گئتیرۀ بیلمۀ دیکدۀ اوُریی لری چیرپینماقدان دایانمیشدیر.

گوُنئی آذربایجانین اوُنودولماز فداکار سیمالاریندان اوُلان ایکی صمیمی دوُست ، مسلکداش ؤ ایکی اوُدلو قلمۀ صاحیب اوُلان بولوت قازاچوُرلو سهند ؤ احمد صادقی أشراقی فرمان ـ یا ألف ـ نورانلی ایدیلار

 بوُلوت قاراچورلو سهند حاققیندا بوگونۀ قدر اوُنا لایق اوُلان چوُخ سایدا دئییرلی مقالۀ لر یازیلمیشدیر. لاکین فرمان حاققیندا !! ؟؟ فرمان اوُز دئدیگینۀ گوُرۀ : اردۀ بیلین نوران کئندیندۀ آنادان اوُلموش ؤ سوُنرالار یوزمینلرلۀ باختی دوُنموش وطن اوُلاد لاری کیمی طالع اوُنو تهرانا سوُروکلئمیشدیر. اوُ گئنج یاشیندان ادبی فعالییت لرۀ باشلارکن ، اوُز آنا دیلی آذربایجان توُرکجۀ سیندۀ یازیب یارادماقا باشلییر ؤ سوُنرالارطبیعی اوُلاراق بیرچوُخ گئنج لر کیمی اوُز میللتی نین شوینیسمین جیناقیندان قوُرتولوشو یوُلوندا ، شاه ساواک ایدارۀ سی نین یاراددیقی قوُرخونج پلیس رژیمینین باسغی لاری نئدنیلۀ ، گیزلی مبارزۀ یولون سئچمیشدی . فرمانین اوُزوندن بوُیوک قارداشی أکبرایسۀ آذربایجان فدائیلریندن اوُلموش ؤ شاه رژیمی طرفیندن توتوقلانیب ، ؤ نهایت چوُخ آغیرایشکنجۀ لرۀ معروض قالدیقدان سوُنرا اعدام اوُلونموشدور.

 فرمان چوُخ باجاریقلی ؤ گوُجلو قلمۀ صاحیب اوُلان ، اینجۀ باخیشلی یازیچی و شاعیرایدی ، ( بهمن اینقلابی دئیلن !! ) فلاکت تاریخیندن سوُنرا ، تهراندا قوُرولموش آذربایجان یازیچیلار جمعییتی ؤ هابلۀ آذربایجان انجمنیندۀ فعالییتۀ باشلارکن ، جمعییتین ؤ انجمنین آکتیولئشمۀ سیندۀ آنا دیلیمیزدۀ یازدیغی أثرلری ؤ گئنیش فعالییت لری ایلۀ تانینمیش بیر شخص ایدی .

 لاکین جللاد خمینی رژیمینین آزادلیقا ؤ اینسانلیغا قارشی باشلادیغی آمانسیز هجوملاردا بیرچوُخ یوُل یوُلداشلارینین توتوقلانماسی ؤ آردیجیل اعدام اوُلمالاری نتیجۀ سیندۀ بو دفعۀ فرمان داوام گئتیریب دوُزۀ بیلمۀ دن 15 بهمن 1363 ینجی ایلدۀ اوُ دئییرلی اینسانین اوُرۀیی غفلتن ، آنجاق مرموز شئکیلدۀ چیرپینماقدان دوُردو . ائلۀ کی من هئلۀ دۀ اوُمئهربان باخیشلی ، گوُلر اوُزلو ، اینسانین اوُلومونون طبیعی اوُلدوقون قبول ائدۀ بیلمیره م . فرمان آنا ؤطنی آذربایجانا ؤ اوُزخالقینا وورغون ایدی ، اوُنون خاطیرۀ سی هئرزاماندا دوُستلارینین اوُریی لریندۀ یاشییاجاق . روحو شاد اوُلسون ـ اوُهئر زامان دئیردی :

 دوُستوم ؛ بیرگوُن ، اوُلماسام ، آغلاما ،

منۀ یاس ساخلاما .

 لاکین ، اوُگوُن کی گوُردون ،

 سیلینیب آدیم اوُرۀ گیندن ،

 اوُ گوُن منۀ آغلا ، منۀ یاس ساخلا . نورانلی

بوُلوت قاراچوُرلو ـ سهند 

ألف نورانلی ـ فرمان

فرمانین یازدیغی گوُزل ؤ پوپولیست أثرلری چوُخدور،

 لاکین تأسوف لراوُلسوُن کی واخت سیزأجل اوُنون یازدیقی بیر چوُخ أثرلرینین نشرینۀ فرصت وئرمۀ دی ، اوُنلاردان بیریدۀ سهند حاققیندا یازدیغی بو پوُئما دیر

نوروز گوُلو سوُلما میشکن هارای قوپدو :

 سهند سوُلدو !

 درۀ لر ـ دوُزلر تیترۀ دی،

 زیروُلردن قارتال اوُچدو ، بوُلبوُل سوسدو ،

 موغان دوُشوندۀ اوُخلانان مارال ـ جیران دیزۀ چوُکدو ،

 آراز یاتاغیندا دوُندو ، ساوالانین گوُزو دوُلدو ،

بو ماتم زارۀ باخدیقجا ، ویغارین اوُزمییب دیندی :

سهند سوُلماز ـ سهند سوُلماز !

 یاناقلاردان آخان قان یاش ، دوُروب حئیرتلۀ دیکسیندی .

 قوُزقون لئش اوُستۀ سیلکیندی ،

 غضب لئندی ، چانقیللیقدان چانقیل تاپیب ،

 قاشین چاتدی ، داغا آتدی !

 نییۀ سوُلماز ، نییۀ سوُلماز ؟

طبیعت دۀ قایدا دیربو، گوُلون عومرو سوُنسوزاوُلماز.

داغ تیترۀ دی :

 طبیعت دۀ اوُنسوُز اوُلماز !

 لاکین سهند قوُنچا دئگیل سوُلا هارین یاغیشلاردا ،

 توُزتک قالخا قاچیشلاردا ،

 اوزاقلاشماق ایتگینلیگدن

 آرالانماق باتقین لاردان ، سوُلماق دئییر.

 سانما سهند با ستیریلیب ، یاتیب ، باتیب اوُیانیلمازیوخولارا ،

 سانما سهند هپیرییب مزاریندا ، سوُنوب اوُد تک اوُجاغیندا ،

 قوُزقون لئشدن باش قوُوزارکن ، باخدی داغین دیک اوُزوُنۀ

 سوُیلۀ گوُروم داغلار داغی ، زامان بوُیو بو دوُنیایا آددیم باسان اینسان اوُغلو ،

 آچیر گوُزوُن ، یوُمور گوُزون ، آدین قویمور یاشایش می؟

 اوُلوم ـ قالیم فاصیلۀ سی گاهدان یاخین ، گاهدان اوزاق ،

 نۀ قدردۀ اوزاق اوُلسا ؛

یوُمور اوُنون شهلا گوُزون زامانۀ نین مین ـ مین بارماغی ،

 بوقایدا دیر طبیعت دۀ سهند سوُلدو ،

 سهند سوُلدو ! داغلار داغی دیلۀ گئلدی :

 سهند سوُلماز ، سهند دئگیل داغ چیچئگی ، باغ چیچئگی ، یازدا آچا ، قیشدا سوُلا ،

 سهند دئگیل گوُنۀ باخان ، گوُن باتاندا ، باتا گوُنلۀ ، آچا گونلۀ .

 سهند ائلین جارچیسی دیر ، سهند ائلین شاعیری دیر ،

 سهند سوُلماز، قوزقون حرص دن گوُلومسۀ دی :

 چوُخ گوُرموشم زامان ـ زامان ، عصیرلردۀ نئسیللردۀ ،

 جنّت کیمی سارای لاردا شاعیرلری ،

 بیر أللری اینجۀ بئلدۀ ، اوُ بیریندۀ قان تک بادۀ ،

 دوُداغلاری ترپئنندۀ ، یولا دوُشوب تیرمۀ ، قبا ،

 لاکین سوُلوبلار حئیاتدا ،

 دیوانلاری مئشین جولود ، قات ـ قات توُزلاردا بوُغولوب ،

 سوُلدو سهند ، اوُلدو سهند ،

 سیل گوُزووی قان یاش توُکمۀ ،

 تورپاق سرین دیر، آیرارسنی ایستکلی شاعیریندن ،

 داعلار داغی آلوولانیب زنجیر چئینۀ دی آغزیندا :

سوس ای دارگوُز !

 عومور بوُیو قارین قولو ، چئکیل ـ چئکیل ، گئن دور بیرآز ،

 چیخارت گوُزوندن گوُزلوگو ، آیریل ایرنج یئمئگیندن ،

چاشما ألوان بئزک لرۀ ، اویما یالان دوُزئکلرۀ ،

 جیققالاردا ، قان ایزلرین گوُنش بیلمۀ ،

 یاشایشی بو گوُن بیلمۀ ،دوُنن بیلمۀ ،

 دوُشوُن !

سهند سرمد دئییر ، صهبا دئییر ، عنصری ـ انوری دئییل ،

 سهند صابیر بالاسی دیر ، وُورغونون یوُل یولداشی دیر،

 نسیمی لر، فضولی لر، واقیف لرین نئسلیندندیر ،

 ائشیت ! ای وارلیغین لئشدۀ گوُرۀ ن ، قارانلیقدا عومور سوُره ن ،

 نئچۀ مین ایل بوندان أوول ، اوُلمپ داغی ، آلله لارین اوُتلاغی ایدی ،

 هاچا ساققال ژوپیتردۀ آلله لارین آللاهی ایدی ،

 سوُیلۀ گوُروم ، بو سوُرودن ، قالیب یادیندا هئچ بیری ؟

 لاکین عصرلردیر دوُروُر، گوُز اوُنوندۀ ، پرومتۀ !

 سهند سوُلا بیلردی ، سهند اوُلۀ بیلردی ،

 سهند ائلۀ باغلی اوُلدو ، اوُنا گوُرۀ سوُلماز اوُلدو .

 سهند ، ائلین ایللر بوُیو اوُره کلریندۀ توُپلانان کینۀ لرین جارچی سیدیر.

 سهند ائلی ، یوُردو باغیشلاسئیدی ، بیر خالا ؟

 دانیشسئیدی اینجۀ بئلدن ، قیوریم تئلدن ، مرمر دوُشدن ،

 گوُل یارپاغینداکی شئه تک ،بیر آنللیقدا یوُخ اوُلاردی ،

 سهندین یاراددیقی شعرلردۀ ائلین اوُریی چیرپینیر .

سهندین ایلهام پریسی ، دوُشنمیش کوُشک لردۀ یوُخ ، تالانمیش یوردلاردا گئذیر،

 لاکین چیچئک اوُلوب سانجیلمیر بختۀ ورلر تئلینۀ ،

 دایاق اوُلور تاپدالانمیش ائلینۀ ،

 گئذیر سوُنوک اوُجاغلاری ،

 بالاسیز آنانین گوُز یاشین سیلیر ،

آناسیز بالانین بوُیون اوُخشاییر ،

 یوُل آچیر صاباحا ، آیدین صاباحا ،

 دوُیوش مئیدانیندا اوُمید جالاییر ،

 سهند ائلین سارسیلمییان ایرادۀ سی ، اوُدلاراوُلکۀ سی نین یوکسئک داغیدیر ،

بویلۀ دیر کی ، سهند سوُلماز ، سهند سوُلماز

 

 ********************************

 بو یازینی فرمانین خاطیرۀ سینۀ حصرائدن : آذرخش ــ 15 دی 1392 ــ منبع گوُنش ژورنالی نمرۀ 2 ــــ 1359 ینجی گوُنش ایلی .

 

 

 

www.solgunaz.com